Dövlət orqanlarında və onların sistemində 2024-cü ildə rəhbər vəzifələrdə çalışan qadınların sayında əhəmiyyətli dəyişiklik baş verməyib.
Qanunmedia.az Trend-ə istinadən xəbər verir ki, bu barədə məlumat Milli Məclisin Ailə, qadın və uşaq məsələləri komitəsinin bu gün keçirilən iclasında müzakirə olunan Ailə, Qadın və Uşaq Problemləri üzrə Dövlət Komitəsinin 2024-cü il üzrə Məlumatında öz əksini tapıb.
Bildirilib ki, məhkəmə sisteminə daxil olan məhkəmələrdə hazırda 163 qadın hakim fəaliyyət göstərir ki, bu da hakim korpusunun 26,1 %-ni təşkil edir.
Qadın hakimlərdən 11 nəfər inzibati vəzifə (1 hakim apellyasiya instansiyası məh-kəməsinin sədri, 1 hakim Ali Məhkəmədə kollegiya sədri, 2 hakim apellyasiya instansiyası məhkəmələrində kollegiya sədri, 6 hakim birinci instansiya məhkəməsinin sədri, 1 hakim birinci instansiya məhkəməsində sədr müavini) tutur.
Məhkəmə aparatlarında isə 1634 qadın çalışır ki, bu da məhkəmə aparatları işçilərinin ümumi sayının 53,6 %-ni təşkil edir.
